Ağ Ev Trampla Lavrovun görüşünün təşkil edilməsi üzərində işləyir

Müzakirə olunacaq mövzular arasında silahlara nəzarət də var.

APA “RİA Novosti”yə istinadən xəbər verir ki, bu barədə ABŞ Prezidentinin milli təhlükəsizlik məsələləri üzrə köməkçisi Robert O’Brayen S.Lavrovun səfəri ilə bağlı “CBS” telekanalının ünvanladığı sualı cavablandırarkən deyib.

“Baxarıq, görərik. Ancaq düşünürəm ki, bunun baş verməsi ehtimalı böyükdür. Biz bunun üzərində çalışırıq”, - deyə Robert O’Brayen bildirib.

Trampla Lavrovun görüşünün əsas məqsədi barədə sualın cavabına gəlincə, O’Brayen qeyd edib ki, “söhbət qarşılıqlı münasibətlər prinsipindən gedir”: “Dövlət katibi Pompeo Rusiyaya səfər edəndə də Vladimir Putin onunla görüşmüşdü. Çinlilər, ruslar və digərləri ilə münasibətdə bəhs etdiyimiz prinsiplərdən biri də qarşılıqlılıq prinsipidir”.

Onun sözlərinə görə, görüş zamanı “silahlara nəzarətlə bağlı ümumi danışıqlar” da mümkündür.

S.Lavrovun Vaşinqtona səfəri barədə hələlik rəsmi açıqlama verilməyib, ancaq Moskva tərəfi bu məsələ üzərində işlərin getdiyini açıqlayıb.

Bu səfər baş tutsa, bu, Lavrovun 2017-ci ildən bəri Vaşinqtona ilk səfəri olacaq.

pia.az