Masallıda toyundan sonra ölən gəlin qətlə yetirilibmiş - Rəsmi,Yenilənib

Masallı rayonunda ölən yetkinlik yaşına çatmayan gəlinin toyundan sonra qətlə yetirildiyi məlum olub.

Bu barədə Report-a Masallı Rayon Prokurorluğundan məlumat verilib.

***

Bildirilib ki, faktla bağlı rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılıb.

Hazırda araşdırma aparılır.

Ailə, Qadın və Uşaq Problemləri üzrə Dövlət Komitəsi Masallı rayonunda toyundan iki həftə sonra sonra vəfat edən gəlinlə bağlı məsələyə münasibət bildirib.

Qurumun İnformasiya və Analitik araşdırmalar şöbəsinin müdiri Elgün Səfərov Oxu.Az-a açıqlamasında bildirib ki, baş verən faktla bağlı araşdırmalara aparır:

“Masallıda baş verən ölüm hadisəsi ilə bağlı Komitənin rayonda yerləşən Qadın Resurs Mərkəzinin monitorinq komissiyası vasitəsilə araşdırma aparılır. Məsələ ilə bağlı araşdırmalara hüquq-mühafizə orqanları da cəlb edilib”.

Komitə rəsmisi qeyd edib ki, Azərbaycan Respublikasında nikah yaşı 18 yaş müəyyən olunur:

“18 yaşına çatmayanlar uşaq hesab edilir. Uşaq hüquqları haqqında qanuna və beynəlxalq konvensiyalara əsasən, uşaq nikahları yolverilməzdir. Baş vermiş fakt onu göstərir ki, onların 16 yaşı var, qeyri-rəsmi nikah yaşıdır. Uşaq nikahlarına yox deyilməlidir, uşaqların nikahına şərait yaradan valideynlər məsuliyyətə cəlb edilməlidir”.

Qeyd edək ki, yanvarın 29-da Xoşçobanlı kəndində naməlum şəraitdə 16 yaşlı gəlin ölüb. İki həftə əvvəl Həsənli kənd sakini, 2003-cü il təvəllüdlü Qəmbərova Fatimə Mais qızı Xoşçobanlı kənd sakininə ərə gedib. Yeni evlənən bəyin isə 19 yaşı olub.

pia.az