“Xocalıda 20-ci əsrin ən böyük faciələrindən biri törədilib” - Türkiyə prezidenti

Bunu bu gün Bakıda Azərbaycan-Türkiyə Yüksək Səviyyəli Strateji Əməkdaşlıq Şurasının VIII iclasından sonra keçirilən mətbuat konfransında Türkiyə Prezidenti Rəcəb Tayyib Ərdoğan bildirib.

Dağlıq Qarabağ münaqişəsinin həllində Türkiyənin hər zaman Azərbaycanın yanında olduğunu vurğulayan Türkiyə Prezidenti deyib ki, sabah Xocalı soyqırımının 28-ci ildönümü qeyd olunacaq: “Xocalıda yaşlı, qadın demədən 20-ci əsrin ən böyük faciələrindən biri törədilib. Tarixə qaranlıq gecə kimi keçən Xocalı soyqırımını unutmadıq, unutmayacağıq. Xocalı qətliamını bir daha lənətləyirik”.

Ərdoğan bildirib ki, FETÖ terror təşkilatı ilə mübarizədə Türkiyəyə ən çox dəstək verən Azərbaycan olub: “Elazığ zəlzələsində də Azərbaycanı yanımızda hiss etdik. Azərbaycana təşəkkür edirik”.

Dörd tərəfdə terror hadisələri baş verdiyi bir vaxtda Azərbaycan və Türkiyə sabitlik adasıdır: “Bunda ordularımızın güclü olması önəmlidir. Bu baxımdan müdafiə sənayelərimizin gücləndirilməsi önəmlidir. “Barış bulağı” əməliyyatı ilə bir millət, iki dövlət olduğumuzu dünyaya göstərdik”.

pia.az