Avropa Birliyinin əsas sənədinin icrası dayandırıldı

Avropa Birliyinin iqtisadiyyat və maliyyə üzrə Şurası(EKOFİN) Birlik tarixində ilk dəfə olaraq Stabillik və İnkişaf Paktının fəaliyyətinin dayandırlması barədə qərar qəbul edib. Bununla bağlı Şurasının saytında Avropa Birliyi maliyyə və iqtisadiyyat nazirlərinin videokonfransından sonra məlumat yerləşdirilib.

Qeyd edək ki, Stabillik və İnkişaf Paktı Birlik üzvü olan dövlətlərin büdcə kəsirini və dövlət borcunun həcmini tənzimləyir. Belə ki, Pakta əsasən birlik dövlətlərində büdcə kəsiri ölkənin Ümumi Daxili Məhsulunun 3 faizindən, dövlət borcu isə 60 faizindən yuxarı ola bilməz. Paktın icrasının dayandırılması üzv dövlətlərə imkan verəcək ki, kreditlər götürüb biznesə yardım edə bilsinlər.

Paktın dayandırılması təklifini Avropa Komissiyası irəli sürüb. Şuranın bəyanatında qeyd olunur ki, Avropa Birliyinin koronavirusun yaratdığı tədhidlərdən minimum itkilərlə çıxması üçün bu addımın atılması qaçılmaz olub: "Nazirlər hesab edirlər ki, Avropa Komissiyasının Birlik ərazisində başlanmış ağır iqtisadi tənəzzülün qarşısını almaq üçün Paktın icrasının dayandırılması təklifi ilə razılaşmaq lazımdır”.

pia.az