“Yaxın günlərdə ermənilər Azərbaycan tərəfinin irəli sürdüyü bütün şərtləri qəbul edəcəklər”

“Bilirəm ki, hamımız cəbhə bölgəsindən tez-tez yeni ərazilərin alınması xəbərini eşitmək istəyirik. Əmin olun ki, yaxın zamanlarda çox şad xəbərlər eşidəcəyik. Şanlı Ordumuz qələbə yürüşünü davam etdirir, düşmən darmadağın edilir. Bu günə ermənilərin mifləşdirdikləri "alınmaz Ohonyan səddi" yarılıb, Dağlıq Qarabağ üçün açar olan Murovdağ zirvəsi bizdədir və bir çox ərazilər azad olunub. Sadəcə maksimum az itki vermək üçün Ordumuz alınmış sahələri tam təmizləməmiş, ətrafda olan yüksəklikləri tam nəzarətə götürməmiş, ərazinin təhlükəsizliyinə tam əmin olmamış, ola biləcək əks hücuma hazır olmamış heç bir elan vermir. Bir də nəzərə alın ki, biz hücum edən tərəfik və düşmən 27 ildir həmin sahələrdə müdafiə sistemi qurub. Ona görə də Ordumuz əsgər və zabitlərimizin təhlükəsizlizliyinə əmin olmamış irəli getmir, heç bir riskə yol vermir. Məhz buna görə də ermənilər 2 mindən artıq itki verdiyi halda bizim şəhidlərimiz dəfələrlə azdır”.

Bunu hüquqşünas Aslan İsmayılov deyib.

A.İsmayılovun sözlərinə görə, Müdafiə Nazirliyinin bəyanatlarından görünür ki, Azərbaycan ordusu durmadan irəliləyir və düşmənə sarsıdıcı zərbələr vurur: “Xəbərlərdə elan edildi ki, Füzuli, Cəbrayıl və digər ərazilər uğrunda döyüşlər gedir. Bu isə o demək deyil ki, həmin sahələr ermənilərin əlindədir. Nəzərə alın ki, həmin sahələrin ətraflarında yüksəkliklər var və həmin yüksəklikləri də tam azad etməmiş həmin ərazilərə daxil olmaq itki vermək deməkdir. Ən önəmli qarşıda olan 2-3 gündür və bu günlər ermənilərin son dirənişi olacaq. Bu müddət ərzində, inşAllah, Füzuli, Cəbrayıl, Ağdərə tam azad olunar. Bu gün ermənilər sözün həqiqi mənasında ölüm-dirim savaşı aparırlar, çünki bilirlər ki, adıçəkilən rayonlar alındıqdan sonra onlar hərbi, həm də mənəvi cəhətdən sınacaqlar və ancaq Qarabağdan Yerevana qaçmaq şansları qalacaq. Əminəm ki, yaxın günlərdə ermənilər Azərbaycan tərəfinin irəli sürdüyü bütün şərtləri qəbul edəcəklər və müharibə haqlı tərəf olan Azərbaycanın qələbəsi ilə yekunlaşacaq! Qarabağ AZƏRBAYCANDIR!”