“Rusiyanın Qarabağdakı davranışı Türkiyəni ABŞ və NATO-dan uzaqlaşdırmaq, Azərbaycanla birlikdə özünə daha da yaxınlaşdırmaq məqsədi güdən diplomatik səylərdir”.
Bu barədə tanınmış erməni siyasətçisi, Miçiqan Universiteti tarix bölümünün rəhbəri, professor Jirayr Lipardiyan Türkiyənin "Ahval" adlı ingilis dilli veb-saytına müsahibəsində bildirib.
O, Cənubi Qafqazdakı prosesləri şərh edərək deyib ki, öz növbəsində Türkiyə Rusiyanın ənənəvi təsir dairəsi sayılan regionda nüfuzunu qüvvətləndirir: “Türkiyə bölgəyə hərbi gücləri ilə gəlir və kimsə bunun qarşısını ala bilməz”.
J. Lipardiyan iddia edib ki, Laçın dəhlizinə nəzarəti ələ keçirməklə Rusiya regiondakı təsirini daha da artırır, eyni zamanda həm Azərbaycan, həm də Ermənistan üçün problem yaratmaq imkanı qazanır.
Erməni siyasətçi deyib ki, Rusiya ermənilərin Dağlıq Qarabağa qaytarılması məsələsində maraqlıdır. Onun sözlərinə görə, əks-təqdirdə rus sülhməramlılarının regiondakı fəaliyyətinə lüzum qalmır.
O, əvvəllər Dağlıq Qarabağ ermənilərinin Ermənistandan idarə olunduğunu, indi isə onların təxminən Türkiyə erməniləri ilə eyni vəziyyətə düşəcəklərini söyləyib:
“Yəni dillərini, məktəblərini, kilsələrini qoruyub saxlayacaq, lakin siyasi gələcəklərini itirəcəklər”.
J. Lipardiyan vurğulayıb ki, ermənilər Türkiyə və Azərbaycanla beynəlxalq güclər vasitəsi ilə deyil, birbaşa əlaqələr yaratmalıdırlar.
Qeyd edək ki, erməni siyasətçinin müsahibəsində söylədikləri fikirləri Azərbaycanın sabiq Xarici İşlər naziri Vilayət Quliyev sosial şəbəkədə paylaşıb.
pia.az
Digərxəbərlər
Populyar xəbərlər
