“Dronlar 2020-ci ildən etibarən Türkiyəni regional gücə çevirib”.
Yenisabah.az “American Purpose”-a istinadla xəbər verir ki, ABŞ nəşri ”Bayraktar TB2” və “Anka-S” kimi türk PUA-larınını tərifləyən təhlilində bu silah növlərinin Yaxın Şərqin geosiyasi mənzərəsində böyük dəyişiklik yaratdığını iddia edib.
“Yerli istehsal olan PUA-ların yaradılması üçün təkan ABŞ-ın 1975-ci ildəki hərbi embarqosu, Vaşinqtonun “Predator” və “Reaper” dronlarını satmaq istəməməsi ilə əlaqədardır. Türkiyə İsraildən “Heron” pilotsuz təyyarələrini almaq məcburiyyətində qalıb. Amma hazırda onun öz dronları olduqca təsiredicidir. “TB2” 24 saat havada qala, həm kəşfiyyat, həm də hücum tapşırıqlarını yerinə yetirə bilər”, – deyə məqalədə qeyd olunur.
Daha sonra bildirilir ki, bu silahların effektivliyi ilk dəfə Türkiyənin sərhədləri xaricində, Suriyada nümayiş olunub. Rusiyanın dəstəklədiyi və 36 türk əsgərinin ölümünə səbəb olan Suriyanın hücumuna cavab olaraq, Ankara İdlib vilayətinə doğru irəliləyən Dəməşqin zirehli qüvvələrinə dağıdıcı bir hücum başlayıb. 100-dən çox tank, zirehli personal daşıyıcısı və hava hücumundan müdafiə sistemləri məhv edilib. “Nəhayət, keçən il Dağlıq Qarabağda türk PUA-ları təqribən 200 tankı, 90 digər zirehli texnikanı və 182 topu sıradan çıxararaq Ermənistanı ərazidən çəkilməyə məcbur edib”.
Təhlilin sonunda vurğulanıb ki, dronlar 2020-ci ildə Türkiyənin regional bir güc olaraq yüksəlməsi üçün çox iş görüb.
pia.az