"Belə çıxır ki, rəsmi olaraq 1 milyondan çox vətəndaşın peyvənd olunması statistikası da saxtadır".
Bunu iqtisadçı alim Qubad İbadoğlu peyvənd vurulması ilə bağlı vətəndaşlara saxta sənəd verən 12 həkimi işdən çıxarılmasından danışarkən deyib.
Onun sözlərinə görə, baş verən bu saxtakarlıqla başqalarının da təqdim etdikləri sənədlərə şübhə yaranacaq:
"Bu barədə Səhiyyə Nazirliyi, İcbari Tibbi Sığorta üzrə Dövlət Agentliyi və TƏBİB birgə məlumat yayıb. Bu pambıq deyil ki, pripiska etsinlər. Dünyanın heç bir yerində belə biabırçılığa rast gəlmək mümkün deyil. Axı onu verən də, alan da fikirləşməlidir ki, onların belə hərəkəti Azərbaycana inamsızilıq yaradacaq, ölkədən kənara səfər edənlərə qarşı tələblərin daha da sərtləşdirilməsinə gətirib çıxaracaq".
Qubad İbadoğlu onu da əlavə edib ki, bir vaxtlar Azərbaycanda keçirilən SAT imtahanlarının nəticələrinə xaricdə şübhə ilə yanaşırdılar:
"İndi də bizim təqdim etdiyimiz vaksin pasportundan şübhələnəcəklər. Belə çıxır ki, rəsmi olaraq 1 milyondan çox vətəndaşın peyvənd olunması statistikası da saxtadır. Eyni zamanda saxta sənəd alanlar virusa yoluxanda da yazacaqlar ki, peyvəndin təsiri olmadı, yenə də xəstələndik. Biabırçılıqdır, saxtakarlığa, yalana, korrupsiyaya son".
Qeyd edək ki, Səhiyyə Nazirliyi, İcbari Tibbi Sığorta üzrə Dövlət Agentliyi və Tibbi Ərazi Bölmələrini İdarəetmə Birliyi birgə məlumatına görə, koronavirus əleyhinə peyvəndin vurulması ilə bağlı vətəndaşlara saxta sənəd verən 12 nəfər həkim işdən çıxarılıb.
pia.az
Digərxəbərlər
Populyar xəbərlər
