Fransanın xarici işlər naziri Stefan Sejurne İsrailin baş naziri Benyamin Netanyahu ilə görüşü zamanı Yaxın Şərqdə sülhün bərqərar olması üçün lazım olan şərtləri açıqlayıb...
Poliqon xəbər verir ki, nazir bu barədə X sosial şəbəkəsindəki səhifəsində yazıb.
Stefan Sejurne vurğulayıb ki, Fransanın regiondakı "balanslaşdırılmış siyasəti" dəyişməz qalacaq.
"Girovlar azad edilməlidir. Atəşkəs razılaşdırılmalıdır. Livandakı gərginliyi azaltmağa başlamaq lazımdır", deyə XİN başçısı qeyd edib.
Nazirin sözlərinə görə, bunlar həm İsraildə, həm də regionda sülh üçün əsas şərtlərdir.
Bundan əvvəl Fransa prezidenti Emmanuel Makron baş nazir Benyamin Netanyahu ilə telefon danışığında Parisin İrana təzyiqin artırılmasını tələb etməyə hazır olduğunu bildirib və eyni zamanda Yaxın Şərqdə vəziyyətin deeskalasiyasına çağırıb.
Fransa prezidenti həmçinin Qüdsü Livan-İsrail sərhədi də daxil olmaqla vəziyyəti gərginləşdirməkdən çəkinməyə çağırıb və Qəzza zolağına humanitar yardımın fasiləsiz çatdırılmasının təmin edilməsinin vacibliyini bəyan edib.
Poliqon.info