Bu günlərdə Şanxay Əməkdaşlıq Təşkilatına (ŞƏT) üzv ölkələrin dövlət başçılarının növbəti toplantısı keçirilib
Sammitdə Rusiya, Çin, Qazaxıstan, Özbəkistan, Qırğızıstan, Tacikistan, İran, Monqolustan və Əfqanıstan prezidentləri, habelə Hindistanın xarici işlər naziri iştirak edib.
Məlum olduğu kimi, Azərbaycanın da bu quruma müşahidəçi qismində daxil olması gözlənilir. Ekspertlər bunun Azərbaycan üçün xeyirli olacağını düşünürlər. Milli Məclisin üzvü Vahid Əhmədov Bakupost.az-a müsahibəsində sözügedən mümkün üzvlüyün üstün cəhətlərindən danışıb:
– Şanxay Əməkdaşlıq Təşkilatı dünya iqtisadiyyatına təsir göstərən qurumlardan biridir. Ən azı ona görə ki, bura dünyanın iri dövlətləri toplaşıb. Azərbaycan təşkilata üzv olmaqla heç nə itirmir. Çünki bu, siyasi deyil, iqtisadi əməkdaşlıq qurumudur. Azərbaycanın iqtisadiyyatını daha da inkişaf etdirmək, xarici bazara çıxışını genişləndirmək, həmçinin qeyri-neft sektorunu inkişaf etdirmək üçün təşkilata müşahidəçi qismində üzv olması mümkündür. Bu, həmçinin ŞƏT-ə üzv dövlətlərin Azərbaycana sərmayə qoymasına da müsbət təsir göstərə bilər.
– Bəs, qurum özü Azərbaycanı sıralarında görməkdə nə dərəcədə maraqlıdır?
– Azərbaycan İpək Yolu kimi böyük layihənin iştirakçısıdır. Bu layihə Çin və ümumiyyətlə, Orta Asiya üçün də böyük əhəmiyyət daşıyır. Azərbaycan karbohidrogen, neft və qaz ehtiyatları olan dövlətdir. Bizim həm də Avropaya çıxışımız var. Bu baxımdan, təşkilata üzvlük onların da marağındadır. Biz istəyirik ki, Azərbaycan daha çox müstəqil dövlət kimi fəaliyyət göstərsin – həm siyasi, həm də iqtisadi cəhətdən. Azərbaycan Ümumdünya Ticarət Təşkilatına üzv olmağa hazırlaşır, bu haqda rəylər var, protokollar imzalanır. Bu da Şanxay Əməkdaşıq Təşkilatına üzvlük məsələsində ciddi önəm daşıyır.
– Azərbaycanın bu quruma üzvlüyü yaxın vaxtlarda reallaşa bilərmi?
– Bu, Azərbaycan hökumətinin apardığı danışıqlardan, həmin danışıqlara uyğun olaraq qarşı tərəfin mövqeyindən asılıdır.