Dələduzluqda təqsirləndirilən sahibkara cəza istənilib
Bakı Ağır Cinayətlər Məhkəməsində vergi ödəməkdən yayınmaqda və dələduzluqda təqsirləndirilən Nəsib Həsənovun cinayət işi üzrə məhkəmə iclası davam etdirilib.
Hakim Şəkər Məmmədovanın sədrliyi ilə keçirilən prosesdə dövlət ittihamçısı çıxış edib. Prokuror N.Həsənovun 9 il 6 ay müddətinə azadlıqdan məhrum edilməsini istəyib.
Məhkəmə iclasında Vergilər Nazirliyinin nümayəndəsi də iştirak edib. Nümayəndə mülki iddianın təmin edilməsini, vergi borcunun təqsirləndirilən şəxsdən tutularaq ödənilməsini tələb edib.
Təqsirləndirilən şəxsin vəkili isə müdafiə çıxışı üçün vaxt istəyib.
Qeyd edək ki, N.Həsənov sahibkarlıqla məşğul olub. İttihama əsasən, N.Həsənov vergi ödəməkdən yayınmada təqsirli bilinir. Onun Vergilər Nazirliyinə 27 min manat vergi borcu olub. N.Həsənov istintaqdan yayındığı üçün Azərbaycan hüquq-mühafizə orqanları biznesmeni axtarışa verib.
Bu barədə "İnterpol"un saytında da məlumat yerləşdirilib.
Məlumatda qeyd olunub ki, 57 yaşlı N.Həsənov Cinayət Məcəlləsinin 213-cü (vergidən yayınma) maddəsi ilə təqsirləndirilir. O, Azərbaycanı tərk etdiyi üçün barəsində dövlətlərarası axtarış elan olunub və saxlanılması üçün İnterpola müraciət edilib.
Daha sonra N.Həsənov Azərbaycan ərazisində saxlanılaraq, barəsində həbs qətimkan tədbiri seçilib.
pia.az