“ATƏT-in Minsk qrupunun həmsədrləri sanki özləri gərginlik yaratmaqda maraqlıdırlar” – Prezident Administrasiyası rəhbərinin müavini, xarici əlaqələr şöbəsinin müdiri Novruz Məmmədov “Newtimes.az” portalına belə deyib
ATƏT-in Minsk qrupu həmsədrlərinin işğal altındakı Ağdam ərazisində vurulan erməni helikopteri haqda bəyanatını (Vasitəçilər Azərbaycanı meyitlərin götürülməsinə imkan verməyə çağırdı) şərh edən Novruz Məmmədov bildirib:
“Minsk qrupunun həmsədrləri bilmirdilər ki, Ermənistan Azərbaycan ərazilərində hərbi təlimlər keçirməyi qərara alıb? Məgər onlar bu təlimlərə 40 minlik qoşunun, eyni zamanda hərbi avadanlıq və silahların cəlb edilməsi haqqında Ermənistanın verdiyi bəyanatlardan xəbərsiz idilər?
Məgər onlar bilmirlər ki, Azərbaycanın beynəlxalq birlik, eləcə də təmsil etdikləri ölkələr tərəfindən tanınmış əraziləri 25 ildir işğal altındadır və bu ərazilərdən bir milyona yaxın insan məcburi köçkünə çevrilərək Azərbaycanın müxtəlif rayonlarında məskunlaşıblar?
Həmsədrləri heç maraqlandırmadı ki, bu hərbi təlimlər nə üçün, hansı məqsədlə keçirilir? Məgər Dağlıq Qarabağdakı separatçı qurumun 40 minlik ordusu var? Axı heç orada 40 min erməni qalmayıb.
Bütün məsələləri həmsədrlər əla bilirlər. Lakin onlar beynəlxalq hüququ arxivə ataraq Ermənistanın mövqeyindən çıxış edirlər. Özü də bu birinci dəfə deyil. Necə yəni helikopter “neytral ərazidə” düşüb. Təəssüf ki, həmsədrlər bunları bilə-bilə edirlər. Amma onu da bilməlidirlər ki, beynəlxalq aləmdə bu gün hökm sürən gərginlik belə məsuliyyətsiz bəyanatların nəticəsində yaranıb.
Digər bir məsələ də çox maraqlıdır. Guya həmsədrlər bilmirlər ki, Ermənistan işğal altında saxladığı Azərbaycan ərazilərini tam minalayıb. Nə üçün bununla bağlı ağızlarına su alıb susurlar? İndi isə onlar özləri qazdıqları quyuya düşüblər.
Daha bir məqama toxunmaq istəyirəm. Həmsədrlər tez-tez öhdəliklərdən danışırlar və bu mövzuda ictimaiyyətə fikir bildirirlər. Bəs onların özlərinin öhdəliyi yoxdur? Yoxsa düşünürlər ki, “siz özünüz razılığa gəlin” deməklə öz öhdəliklərini yerinə yetirmiş hesab edirlər. Bu məsələ hamıya aydındır: münaqişənin sülh yolu, danışıqlar vasitəsi ilə beynəlxalq hüququn normalarına uyğun, ədalətli həlli üçün beynəlxalq birlik və tarix qarşısında məsuliyyət də, öhdəlik də həmsədrlərin üzərindədir. Onlar turist deyillər”.
pia.az
Digərxəbərlər
Populyar xəbərlər
