“Nəbatat bağında yanğın baş verməsi ilə bağlı yayılan xəbərlər həqiqəti əks etdirmir. Orada heç bir yanğın baş verməyib”
Bunu virtualaz.org saytına açıqlamasında Azərbaycan Milli Elmlər Akademiyasının mətbuat katibi Baba Əliyev AMEA Botanika İnstitutunun nəzdində olan Nəbatat bağında yanğın baş verməsi xəbərinə aydınlıq gətirərkən deyib.
O vurğulayıb ki, yanğın xəbərini Fövqəladə Hallar Nazirliyi də təsdiqləməyib: “Əgər yanğın olubsa, onda həmin yerə mütləq FHN əməkdaşları getməli idi. Nazirlik isə yanğın xəbərini təsdiqləməyib. İkincisi, yanğınla bağlı yayılan fotonu da araşdırdıq və məlum oldu ki, yanğın baş verən ərazi Nəbatat bağına aid deyil”.
Mətbuat xidməti belə xəbərlərin yayılmasını Nəbatat bağına qarşı kampaniya kimi qiymətləndirir.
Qeyd edək ki, ötən gün və ondan öncə mətbuatda iyunun 22-də bağda yanğın baş verməsi və bir neçə ağacın yanması barədə məlumatlar yayılmışdı.
pia.az