Finlandiyanın “HMD Global” şirkəti qabaqcıl “Nokia 8” smartfon modelinin təkmilləşdirilmiş versiyasının buraxılacağını rəsmən təsdiq edib
İKT.lent.az-ın 3dnews.ru-ya istinadən xəbərinə görə, qurğu orijinal “Nokia 8”dən texniki xüsusiyyətlərinin daha da yaxşılaşdırılması ilə fərqlənəcək.
6 GB-lıq operativ yaddaşla təchiz ediləcək təkmilləşdirilmiş “Nokia 8” modelinin quraşdırılmış yaddaş tutumu 128 GB-dək artırılacaq. Smartfonun yalnız göy rəngdə buraxılması planlaşdırılır.
Bildirilir ki, “Nokia 8” oktyabrın 20-dən etibarən Avropada 670 avroya satışa çıxarılacaq ki, bu da 4 GB-lıq operativ yaddaşa malik adi versiyadan 90 avro bahadır. Modelin digər ölkələrdə satışa çıxarılması barədə məlumat verilmir.
Xatırladaq ki, “Nokia 8” səkkiznüvəli “Qualcomm Snapdragon 835” prosessor, 4 GB-lıq operativ, 64 GB-lıq quraşdırılmış yaddaş, “Zeiss” optik şüşəsinə malik 13 meqapikselli qoşa kamera, 13 meqapikselli ön kamera və 3 090 milliamper/saat tutumlu akkumulyatorla təchiz edilib.
pia.az