“Rusiya və Azərbaycan Qərbin sanksiyaları nəticəsində indi bir-birinə daha çox yaxınlaşıb”
Musavat.com-un məlumatına görə, bu sözləri Bakıda Rusiya-Azərbaycan Hökumətlərarası Komissiyanın iclasında Rusiya hökuməti başçısının müavini Dmitri Roqozin deyib.
“2013-cü ilin yekunlarına görə, dünya bazarlarında heç də yaxşı olmayan məqamlara rəğmən, iki ölkəmiz arasında ticarət dövriyyəsi 3.6 milyard dollar olub ki, bu da 2012-ci illə müqayisədə 5% artıqdır”. Onun sözlərinə görə, bu da iki ölkə arasında yaxınlaşmanın təzahürüdür.
Bununla belə, Roqozinə görə, Rusiya və Azərbaycanın ticarət bazarları balanslı olmalıdır.