"ABŞ-ın Suriya ilə bağlı apardığı strategiya indiyə kimi heç bir əsaslı nəticə verməyib"
Bu sözləri Axar.az-a açıqlamasında politoloq İlqar Vəlizadə deyib. Onun bildirdiyinə görə, ABŞ Suriya ilə bağlı yeni planlar hazırlamaqdadır:
“ABŞ artıq təlim-tədris və hərbi təchizat strategiyasını dəyişmək üzrədir. Suriya ilə bağlı apardığı siyasət indiyə kimi heç bir əsaslı nəticə verməyib. Bu illər ərzində Azad Suriya Ordusu uzunmüddətli nailiyyət əldə etməyib. Hətta hadisələr göstərir ki, Bəşər Əsəd ordusu xarici müdaxiləni əsas tutaraq mövqe üstünlüyü əldə etməyi bacarıb. Ona görə də, ABŞ bunu anlayaraq siyasəti dəyişmək qərarını verib.
Qeyd etmək lazımdır ki, Obamanı həm respublikaçılar, həm də demokratlar Suriya məsələsi ilə bağlı ciddi tənqid edirlər. Çox güman ki, başqa planlar üzərində iş gedir. Ola bilsin ki, ABŞ Azad Suriya Ordusundan tamamilə əl çəksin. Yaxud digər planlar müzakirə oluna bilər. Düşünürəm ki, burada Türkiyənin rolu müəyyən dərəcədə artacaq”.
“Bu fonda Rusiya Əsəd və müttəfiqləri vasitəsilə öz dayaqlarını möhkəmləndirir və bu işləri koordinasiya edir. Qeyd etmək lazımdır ki, bu koordinasiya da öz nəticəsini verir. Rusiyanı bu əməliyyatlarda dəstəkləyən İran və Əsəd rejimi, o cümlədən İraqın şiə hökuməti müəyyən üstünlük əldə ediblər. Rusiya bundan sonra Tartusdakı hərbi bazasında möhkəmlənəcək. Bununla da Yaxın Şərqdəki üstünlüyünü təsdiq edəcək”.
pia.az