“Şadlıq sarayları şəbəkəsi nəzarətə götürüləcək“

Hökumət şadlıq evləri ilə bağlı hərəkətə keçdi

Restoranlar toy sahibləri ilə müqavilə imzalamağa məcbur ediləcək; Vahid Əhmədov: “Birinci növbədə vergi sistemini tənzimləmək lazımdır”

“Yeni Müsavat” qəzetinin ötən sayında manşetdən “Şadlıq evləri bağlanır” sərlövhəli yazı dərc edilib. Məqalədə bildirilir ki, “toy oliqarxları”na böyük zərbə hazırlanır, dövlət yas mərasimlərinin tənzimlənməsindən sonra toy biznes sektorundakı xaotik vəziyyəti də qaydaya salmağı nəzərdə tutur. Həmçinin bizə daxil olan məlumatda o da qeyd edilir ki, bunun üçün xüsusi qanun layihəsi hazırlanır.

Burada məsələnin ən sensasional cəhəti isə budur ki, ölkədə göbələk kimi boy verən şadlıq sarayları şəbəkəsi tam nəzarətə götürüləcək və bu sarayların bir çoxunun təyinatı məcburən dəyişdiriləcək. İndiki şadlıq saraylarının əksəriyyəti ticarət-əyləncə və idman-əyləncə komplekslərinə çevriləcək. Onlara itirdikləri gəlirləri bu sahədə kompensasiya etmək imkanları yaradılacaq.

Dünən ölkə mediasında yayılan xəbərlərdən aydın olur ki, hökumət artıq prosesə start verib.

Standartlaşdırma, Metrologiya və Patent üzrə Dövlət Komitəsi restoran sahibi ilə sifarişçi arasında müqavilə imzalamağı təklif edir. Məqsəd isə mövcud problemin həllinə nail olmaqdır.

Komitənin mətbuat xidmətinin rəhbəri Fazil Talıblı hafta.az-a açıqlamasında bildirib ki, komitə olaraq bu təklif gələcəkdə qanun kimi təkmilləşdiriləcək: “Şadlıq evləri ilə bağlı Azərbaycanda standart mövcuddur. Standartda şadlıq evlərinin təsnifatı, interyeri, onun ətrafındakı infrastrukturu və digər məsələlərin tənzimlənməsi qeyd olunub. Əsas tənzimlənmə predmetinə qida məhsullarının keyfiyyəti, köhnə yeməklərin yeni kimi təqdim olunması daxildir. Restoran sahibi ilə istifadəçi arasında müqavilə imzalansa, bu məsələlər həllini tapa bilər. Düzdür, elə sifarişçi ola bilər ki, övladının toyunda bolluğun olmasını istəyir, eləsi də var ki, menyuda seçilmiş yeməklər tələb edir. Hər iki halda müqavilə imzalanmalıdır”.

Deputat, Milli Məclisin İqtisadi siyasət komitəsinin üzvü Vahid Əhmədov isə düşünür ki, bunu qanunla tənzimləmək mümkün deyil: “Birinci növbədə vergi sistemini tənzimləmək lazımdır. Orada olan proseslər izlənilsin. Bu mövzunun Milli Məclisdə müzakirə edilməsinin də tərəfdarı deyiləm. Yas mərasimlərinin qanuniləşdirilməsinin tərəfdarıyam. Birinin imkanı var, digərinin yoxdur. Bunu qanuna salmaq düzgündür. Amma restoranlar özəl obyektlərdir. Buranın da müəyyən xərcləri var. Sadəcə, vergi sistemi təkmilləşdirilsin. Vergilər Nazirliyinin əməkdaşları monitorinq aparsın. Bunun inzibati qaydada tənzimlənməsi çətin məsələdir”.

Onu da bildirək ki, ötən ay Standartlaşdırma, Metrologiya və Patent üzrə Dövlət Komitəsi tərəfindən 3 şadlıq evində kulinariya məhsullarının uyğunluq sertifikatlarının, xammal tədarük edilən firmalarla müvafiq müqavilələrin, yeməklərin hazırlanma prosesini, saxlanma şəraitini və müddətini müəyyən edən texnoloji təlimat və resepturaların mövcud olmadığı aşkar edilib. Bundan başqa, müəssisədə məhsulların saxlanılması zamanı temperatur rejiminə və mal qonşuluğuna əməl olunmadığı, burada çalışan personalın gigiyenik və sanitar normalara riayət etmədiyi, istehsal edilən məhsulların dövri olaraq sınaqlarının aparılmadığı, sınaqların aparılması üçün hər hansı akkreditasiya olunmuş laboratoriya ilə müqavilənin olmadığı da aşkar edilib.