Azərbaycanda narkotik çəkənlərin sayı niyə artıb? - Psixoloqdan açıqlama

Son vaxtlar narkotik çəkənlərin sayı nəzərəçarpacaq dərəcədə artıb. Hətta görülən sərt tədbirlər sayəsində də bu sahədə müsbət dönüş etmək mümkün olmur.

Narkotik aludəçilərinin sayının artmasına səbəb nədir?

Bu barədə Yenisabah.az-a danışan psixoloq Vüsalə Rüstəm ən ümdə səbəb olaraq pandemiyanın fəsadlarını göstərib:

“Ünsiyyətin pozulması, sosial çətinlik, depressiv vəziyyət, bir yerdə uzun müddət yaşamaq və ya işləmək, boşanmalar, adət etmədiyi pandemik vəziyyət və s. insanların bu yola üz tutmasında böyük rol sahibidir. Narkotik maddə satıcıları insanlara bununla rahatlıq tapacaqlarını deyərək onları aldadır. Əslində isə heç bir rahatlıq yoxdur. Ölümün ən hörmətsizidir ki, onu sənə təklif edirlər”.

Psixoloq qeyd edib ki, problemini həll edə bilməyən iradəsiz, çevrəsində normal dostları olmayan insanlar çox asanlıqla “kruq”a daxil olur: "Heç kim bundan sığortalanmayıb. Bəzən çox insan düşünür ki, onun oğlu mühəndisdir, həkimdir, polisdir, universitet müəllimidir və buna görə də artıq təhlükə yoxdur. Çox səhv düşüncədir. Belə düşünən insanların narkotiklərlə mübarizə aparan həkim və psixiatrlarla söhbət etməsi bəs edər ki, vəziyyətin nə dərəcədə ciddi olduğunu anlasınlar. Onların müalicə etdiyi narkomanlar arasında hər peşədən insan var. Deməli, təhsil və peşə də kiminsə bu yola düşməsinə mane ola bilməz. Düşüncəmizi dəyişib ətrafımızda olan dosta, qohuma daha diqqətli və bilincli davranmalıydım. Bəlkə, kimisə xilas edə bildik”.

Vüsalə Rüstəm vurğulayıb ki, narkotik vasitə birinci növbədə insanda psixoloji problem yaradır:

“Qan vasitəsilə bütün orqanlara daxil olub beyin hüceyrələrinə hopur. Bu isə davranış problemi deməkdir. Yuxusuzluq, qızarmış və şüşə kimi gözlər, qəfil arıqlamaq, evdəki hamam otağından, ayaqyolundan uzun müddət çıxmamaq, gecə yuxusunun pozulması, daim evdən itən əşyalar, pul bunun göstəricisidir. Azca diqqət bəs edir ki, dəyişən davranışı fərq edək”.

Həmsöhbətimiz hesab edir ki, narkotiklə mübarizə dövlətin təkbaşına görəcəyi iş deyil, cəmiyyət də kömək etməlidir:

“Pandemiyadan əvvəl bu sahəyə daha geniş yer verilirdi. Hüquq mühafizə orqanları məktəblərlə, universitetlərlə birgə iş görüb insanları məlumatlandırırdı. Pandemiya vəziyyətində isə çarə tək mətbu orqanlara -saytlar və televiziya vasitəsilə məlumatlandırmaya qalır. Yenə də hər valideyn yaşından asılı olmayaraq öz övladının dost-tanışı, çevrəsi ilə maraqlanmalıdır. Sağlam ailə sağlam cəmiyyət deməkdir. Gec olmadan gələcəyimizə biganə qalmayaq”.

pia.az