Xəbər verdiyimiz kimi, ötən gün Azərbaycan Ordusunun müddətli həqiqi hərbi xidmət hərbi qulluqçusu, əsgər Tağıyev Rəvan Zeynalabdin oğlu ona təhkim edilmiş avtomat silahdan atəş açaraq özünü öldürüb.
“Unikal”ın əldə etdiyi məlumata görə, R.Tağıyev Yevlax rayonunun Salahlı kəndindəndir. Onun hərbi xidmətini başa vurmasına 3 ay qalıbmış.
Rəvanın özündən böyük bir qardaşı da var. Böyük qardaşı yenicə hərbi xidmətdən qayıdıb. O, Naxçıvanda xidmət edib.
R.Tağıyevin nəşi bu gün doğulduğu Salahlı kəndinə gətirilib və orada dəfn olunub.
***
Azərbaycan Ordusunun hərbi qulluqçusu intihar edib.
PİA.az xəbər verir ki, bu barədə Baş Prokurorluğun mətbuat xidmətindən bildirilib.
Qeyd olunub ki, iyulun 5-i saat 17 radələrində Azərbaycan Ordusunun müddətli həqiqi hərbi xidmət hərbi qulluqçusu, əsgər Tağıyev Rəvan Zeynalabdin oğlunun ona təhkim edilmiş avtomat silahdan atəş açaraq özünü öldürməsi faktı ilə bağlı Hərbi prokurorluqda Cinayət Məcəlləsinin 125-ci (özünü öldürmə həddinə çatdırma) maddəsi ilə cinayət işi başlanmaqla hazırda istintaq aparılır.
***
Laçın rayonunda hərbi xidmətdə olan Yevlaxın salahlı kənd sakininin hərbi xidmətdə şəhid olması xəbəri yayılıb.
PİA.az Meydan TV-yə istinadla xəbər verir ki, əsgər Rəvan Zeynalabdin oğlu Tağıyevin şəhid olması barədə yaxınları sosial şəbəkədə məlumat yayıblar:
“Səhər əmisinə zəng vurublar ki, qardaşın oğlu şəhid olub, gəlin cənazəni götürün. Tam olaraq hadisə necə baş verib hələ bilmirik. Sadəcə boğazından güllə ilə vurulub”.
Səfərbərlik və Hərbi Xidmətə Çağırış üzrə dövlət xidmətinin Yevlax rayon şöbəsinin əməkdaşı hadisəni təsdiqləsə də, səbəbləri barədə məlumatsız olduğunu bildirib:
“Hazırda adamlar əsgərin dəfninə gedib. Ekspertizanın cavabı olmadan heç nə deyə bilmərəm.”
Müdafiə Nazirliyinin Mətbüat Xidməti rəhbəri Anar Eyvazov hadisənin araşdırıldığını bildirib:
“Araşdırırıq. Cavab verəcəyik”.
pia.az