Politoloq: Ukraynadan sonra növbəti qurban Ermənistan seçiləcək...

Samir Hümbətov: “ABŞ, Ermənistan və Avropa İttifaqı arasında imzalanan bu anlaşma əslində regionda yeni gərginliyin formalaşmasına gətirib çıxara bilər”.

“Aprelin 5-də Brüsseldə imzalanacaq təhlükəsizlik sazişi Ermənistana xeyirdən çox zərər gətirə bilər”.

Bu sözləri politoloq Samir Hümbətov Aİ-Ermənistan-ABŞ-ın keçirilməsi nəzərdə tutulan birgə konfransını Poliqon-a şərh edərkən qeyd edib.

Aprelin 5-də Brüsseldə Aİ-Ermənistan-ABŞ birgə konfransı keçiriləcək. Konfransda ABŞ-ın Dövlət Katibi Entoni Blinken, Avropa Koçissiyasının sədri Ursula fon der Leyen və Ermənistanın Baş naziri Nikol Paşinyan iştirak edəcək. Yayılan məlumata görə bu görüşdə Avropa İttifaq və ABŞ-ın Ermənistana təhlükəsizlik təminatı vermək barədə saziş imzalanacaq və bu saziş Ukrayna ilə bir sıra ölkələrin imzaladığı sazişin eynisi olacaq.

KTMT üzvü olan bir ölkəyə ABŞ və Aİ tərəfindən belə bir təminatın verilməsi nədən xəbər verir və imzalanacaq təhlükəsizlik təminatı regionda hərbi və yaxud siyasi balansı poza bilərmi?

Ermənistanın Qərbə tərəf atdığı növbəti addımını Poliqon-un əməkdaşı Diplomatiya Araşdırmaları Mərkəzinin sədri, politoloq Samir Hümbətov ilə müzakirə edib.

Samir Hümbətov: “ABŞ və Avropa İttifaqının Ermənistanı bu dərəcədə hərbi sahədə dəstəkləmək cəhdləri həm də regiona yeni gərginlik gətirə bilər”.

Ermənistan bu addımı atarsa, bunun Rusiyanın qəzəbinə daha çox səbəb ola biləcəyini qeyd edən politoloq Poliqon-a açıqlamasında vurğulayıb ki, bu da son nəticədə Ermənistana siyasi, iqtisadi və təhlükəsizlik baxımından ciddi zərbə vura bilər:

“ABŞ, Ermənistan və Avropa İttifaqı arasında imzalanan bu anlaşma əslində regionda yeni gərginliyin formalaşmasına gətirib çıxara bilər. Nəzərə almaq lazımdır ki, bu gün Rusiya və Ermənistan arasında gərgin münasibət mövcuddur. Belə gərgin münasibətin mövcud olduğu bir dövrdə münasibətləri daha da kəskinləşdirmək və Qərbə bu qədər yaxınlaşma Ermənistan daxilində ciddi problemlər də yarada bilər.

Bir məsələ də var ki, ABŞ və Avropa İttifaqı Rusiyanı daha çox küncə sıxışdırmaq siyasətini yürüdürlər. Yəni onlar Cənubi Qafqazda möhkəmlənmək üçün bütün imkanlardan istifadə edirlər. Nəzərə almaq lazımdır ki, hələ Rusiya qoşunları Ermənistan ərazisindədir, Ermənistan KTMT-in üzvüdür. Belə olan halda bu cür müqavilənin imzalanması KTMT nizamnaməsinə də ziddir. Ona görə də düşünürəm ki, aprelin 5-də Brüsseldə imzalanacaq təhlükəsizlik sazişi Ermənistana xeyirdən çox zərər gətirə bilər.

Samir Hümbətov: “ABŞ və Avropa İttifaqı Cənubi Qafqazda möhkəmlənmək üçün bütün imkanlardan istifadə edirlər”.

Hesab edirəm ki, ABŞ və Avropa İttifaqının Ermənistanı bu dərəcədə hərbi sahədə dəstəkləmək cəhdləri həm də regiona yeni gərginlik gətirəcək. Təbii ki, bunu həm də Ermənistana açıq həm siyasi, həm də hərbi dəstək göstərilməsi kimi də dəyərləndirilə bilər.

Qeyd edim ki, müqavilənin imzalanmasında Aİ diplomatiyasının rəhbəri Ursula fon der Leyenin iştirakı da təsadüfi hal sayılmır. Hesab edirəm ki, Ukraynadan sonra növbəti qurban Ermənistan seçiləcək. Çünki Ermənistan bu addımı atarsa, bu Rusiyanın qəzəbinə daha çox səbəb ola bilər. Bu da son nəticədə Ermənistana siyasi, iqtisadi və təhlükəsizlik baxımından ciddi zərbə vura bilər”.

Nərminə UMUDLU
Poliqon.info