Ukraynanın xarici işlər naziri Dmitri Kuleba iyunda İsveçrədə keçiriləcək konfransın məqsədini ümumi prinsip və yanaşmalara malik ölkələrin koalisiyasının yaradılması adlandırıb...
Poliqon xəbər verir ki, nazir bu barədə "Foreign Policy" nəşrinə müsahibəsində danışıb. Dmitri Kuleba "Rusiyanın iştirakı olmadan İsveçrədə sülh konfransı keçirməyin nə mənası var" sualına cavab verib.
O bildirib ki, konfransdan sonra Rusiya ilə ünsiyyət mümkündür.
"Bundan sonra Rusiya ilə ünsiyyət ola və Moskva da danışıqların bir hissəsi ola bilər. Nəticədə hər iki tərəf olmadan müharibəni bitirmək olmaz", deyə Dmitri Kuleba bildirib.
Dmitri Kuleba müsahibəsində həmçinin bildirib ki, ABŞ-ın bu yaxınlarda təsdiqlənmiş 61 milyard dollarlıq yardımı çərçivəsində silah və sursat Ukraynaya hələ də daxil olmayıb. O etiraf edib ki, Rusiya qoşunlarının yerdəki hücumu da daxil olmaqla, hərbi yardım gəlməzdən əvvəl "pis şeylər" baş verə bilər.
İsveçrədə sammit 15-16 iyun tarixlərində baş tutacaq. "Bloomberg"in məlumatına görə, 80-100 ölkə dəvət alıb. Ukrayna prezidenti Volodimir Zelenski bildirib ki, İsveçrədəki konfrans nəticəsində münaqişənin sülh yolu ilə həlli planını özündə əks etdirən sənəd hazırlanacaq. Ukrayna prezidentinin sözlərinə görə, güclü ölkələr Rusiyaya siyasi təzyiq göstərməlidirlər ki, Moskva müəyyən edilmiş şərtlərlə razılaşsın.
Poliqon.info
Digərxəbərlər
Populyar xəbərlər
