Bu il Azərbaycanda magistratura və rezidenturaya qəbul imtahanının II mərhələsində iştirak edəcək bakalavrların sayı açıqlanıb
Dövlət İmtahan Mərkəzindən APA-nın sorğusuna cavab olaraq bildirilib ki, iyunun 4-də keçiriləcək magistraturaya qəbul imtahanının II mərhələsində 9677 bakalavr iştirak edəcək. Onlardan 8800-ü Azərbaycan, 877-si isə Rus bölməsi üzrə imtahan verəcək.
İyulun 5-də isə rezidenturaya qəbul imtahanının II mərhələsi keçiriləcək və burada iştirak etmək istəyən namizədlərin sayı 647 nəfərdir. Onlardan 580-i Azərbaycan, 67-si Rus bölməsinin məzunudur.
Qeyd edək ki, magistraturaya və rezidenturaya qəbul imtahanının I mərhələsi aprelin 9-da keçirilib. Bakalavrlara qəbul imtahanının I mərhələsində məntiqi təfəkkür üzrə 50, xarici dil üzrə 25 və informatika üzrə 25 test tapşırığı təqdim olunub. Qəbul imtahanının II mərhələsində isə bakalavrların ixtisas fənləri üzrə bilikləri yoxlanılacaq.
Rezidenturaya qəbul imtahanının I mərhələsində namizədlərin baza fənləri üzrə, II mərhələsində isə ixtisas fənləri üzrə biliklərin qiymətləndirilməsi aparılacaq.
pia.az