“Statistika Komitəsinin statistik dəyərləndirməsinə yox, real təhlillərə daha böyük önəm verməni daha doğru sayıram”
Bu fikirləri Dövlət Statistika Komitəsinin əhalinin gəlirləri ilə bağlı hesabatına münasibət bildirən iqtisadçı Məhəmməd Talıblı PİA.AZ-a açıqlamasında qeyd edib.
Dövlət Statistika Komitəsindən verilən məlumata görə, bu ilin yanvar-may aylarında ölkə əhalisinin gəlirləri əvvəlki ilin eyni dövrü ilə müqayisədə nominal ifadədə 8,3% artaraq 17 511,6 mln. manata çatıb. Ötən həftə isə Dövlət Statistika Komitəsindən verilən məlumatda göstərilirdi ki, 2016-cı ilin yanvar-may aylarında ümumi daxili məhsul (ÜDM) 4,2% azalıb. ÜDM-nin 4,2% azaldığı şəraitdə əhalinin gəlirlərinin 8,3% artması ilə bağlı DSK-nin məlumatlarında hansısa uyğunsuzluq varmı?
Bu mövzu ilə bağlı PİA.AZ-ın əməkdaşı iqtisadçı ekspert Məhəmməd Talıblıya müraciət edib.
Məhəmməd Talıblı: “Real gəlirlərin artması realistik vəziyyəti daha dəqiq ifadə etməyə imkan verir”.
Dövlət Statistika Komitəsinin statik göstəricilərini inandırıcı saymayan Məhəmməd Talıblıya görə, real təhlilərə önəm vermək daha məqsədəuyğundur:
“Əslində iqtisadi baxımdan məntiqlidir. ÜDM-in həcmi azalırsa, əhali gəlirləri də azalmalıdır. Əhali gəlirlərinin azalmasının əsas göstəricisini istehlak mallarının satış həcmindəki azalmalardan da görmək olur. Əhalinin gəlirlərinin azalmasından danışarkən, heç şübhəsiz ki, onların xərclərinin strukturuna da diqqət etmək lazımdır. Ölkə əhalisi gəlirlərinin 72 %-ni yalnız ərzaq məhsullarının alınmasına sərf edir. Yerdə qalanını isə qeyri-ərzaq məhsullarına, digər xidmətlərə ayırır.
Deməli, bu ölkədə yoxsulluq dərinliyinə yaxınlaşmanı şərtləndirir. Əhali gəlirlərinin nominal artması yox, real gəlirlərinin artmasına xüsusi diqqət etmək lazımdır. Real gəlirlərin artması realistik vəziyyəti daha dəqiq ifadə etməyə imkan verir. Ona görə Statistika Komitəsinin statistik dəyərləndirməsinə yox, real təhlillərə daha böyük önəm verməni daha doğru sayıram.”
Gülşən ŞƏRİF
pia.az