Aslan İsmayılov Nərgiz Yaqublunun vəfatından yazdı

"Ölkəmizdə Nərgizin arzuladığı cəmiyyəti qurmaqla onun ruhunu şad etmək olar"

Tanınmış vəkil Aslan İsmayılov özünün facebook səhifəsində Müsavat Partiyası başqanının müavini Tofiq Yaqublunun qızı Nərgiz Yaqublunun vəfatı barədə fikirlərini paylaşıb.

PİA.AZ həmin yazını təqdim edir:

"Bu dəqiqələrdə siyasi məhbus, Qarabağ müharibəsi veteranı Tofiq Yaqublunun qızı Nərgizin vəfatı xəbərini eşitdim. Çox üzüldüm, bir daha anladım ki, həyat ədalətli olduğundan da çox amansız imış. Bir daha əmin oldum ki, çoxlarının bəyənmədiyi millət yaxşını unutmur və dəyərini verir. Bu günə qədər çox tanınmışlar, o cümlədən nakam yaşlarında rəhmətə gedənlər oldu, ancaq sosial şəbəkədə bu qədər hüzr, acı olmamışdı.

Yazıların ardı arası kəsilmir, oxuduqca insan param parça olur. Tofiq Yaqublunu şəxsən tanıyırdım və qururluğuna, mübarizliyinə, Vətənə məhəbbətinə xüsusi hörmətim vardı. Qızları Nərgiz və Nigar da atalarının tam oxşarı idilər. Ancaq onun ailəsinə də insanların bu qədər məhəbbətini bilmirdim. Çox təəssüf ki, biz bir birimizə olan münasibətimizi, məhəbbətimizi ancaq faciəli günlərdə bildiririk. Ataların qızlarına olan sevgisini hamı bilir. Bu məqamda həbsdə olan Tofiqə deyiləcək söz, zənnimcə, yoxdur. Bilmirəm, Nərgizi harada dəfn edəcəklər.

Dəqiq bildiyim odur ki, Nərgiz Bakıda dəfn olunsa, ancaq insanların sel kimi dəfn mərasiminə axışması Tofiq üçün azacıq təsəlli olardı. Hakimiyyət təmsilçilərindən tam əlimi üzmüşəm. Lakin yenə də inanıram ki, Tofiq Yaqublunu dərhal həbsdən azad etməklə, Nərgizin dəfnini Bakıda təşkil etməklə hakimiyyət nümayəndələri insanların, xüsusilə müxalifət təmsilçilərinin, onlara olan düşmən münasibətini az da olsa dəyişmiş olardı. Buna isə ağıl və ürək lazımdır. Sonda ölkəmizdə Nərgizin arzuladığı cəmiyyəti qurmaqla onun ruhunu şad etmək olar. Nərgizə rəhmət, ailəsinə isə səbr diləyirəm".