Bu gün səhər saatlarında Bakıda sərnişin avtobusu qəza törədib
Movqe.az-ın hadisə yerində olan əməkdaşının verdiyi xəbərə görə, Binəqədi-"Gənclik" metrostansiyası istiqamətində hərəkət edən 133 saylı avtobus Azadlıq prospektində tuneldə hərəkət edərkən bardürə çırpılıb.
Yüksək sürətlə hərəkət edən avtobus daha sonra qarşıda hərəkət edən avtomobillə toqquşub. Nəticədə zəncirvari qəza baş verib. Qəzadan təşvişə düşən sərnişinlər avtobusdan boşaldılıb.
Sayt avtobus xəttinin sahibkarı, "Çinar Trans" MMC-nin rəhbəri Etibar Manafovla əlaqə saxlamaq istəsə də cəhdləri alınmayıb. E. Manafovun mobil telefonuna zəng çatmayıb.
Xatırladaq ki, bu, 133 saylı avtobus xəttində son günlər baş verən ikinci qəza hadisəsidir. Ötən ay bu xəttin sürücüsü Valid Məmmədov iki piyadanı vurmuşdu. Nəticədə sərnişinlərdən birinin - Samir Həsənovun qabırğaları sınıb, ciyəri dağılıb və dalağı çıxarılıb.