İyulun 23-də həbs edilən Müsavat Gənclər Təşkilatının(MGT) MTK-nın sədri Fərəc Kərimlinin avqustun 1-də Bakı Apellyasiya Məhkəməsində şikayətinə baxılıb
Gənc fəalın səhhətinin pisləşməsi əlaqədar məhkəməni təxirə salınması ilə bağlı vəsatət verməsinə baxmayaraq, hakim məhkəmə prosesini təxirə salmayıb. Prosesin sonunda hakim Fərəc Kərimlinin şikayətinin təmin edilməməsi barədə qərar çıxarıb.
Bu barədə musavat.com-a Fərəc Kərimlinin vəkili Nemət Kərimli məlumat verib. O, sabah Fərəc Kərimli ilə görüşəcəyini bildirib: “Məhkəmədə ona işgəncə verilib-verilməməsi ilə bağlı söhbətimiz olmadı. Sabah onunla görüşəcəm. Yalnız ondan sonra bu barədə nəsə deyə bilərəm. Məhkəmə zamanı özünü olduqca pis hiss edirdi. Sağlamlığında həyatına təhlükə yaradacaq problemlər ortaya çıxıb”.
Xatırladaq ki, Fərəc Kərimlidən bir həftə öncə qardaşı Sirac Kərimli həbs edilib. Hər iki qardaşa qarşı Cinayət Məcəlləsinin 234.4.3 maddələri ilə( kütləvi narkotik maddələri əldə etmə, saxlama və satma) ittiham irəli sürülüb. Barələrində 3 aylıq həbs qətimkan tədbiri seçilib. Hazırda onlar 1 saylı Bakı İstintaq Təcridxanasında saxlanılırlar. Qardaşları irəli sürülən maddə üzrə 7 ildən 12 ilə qədər azadlıqdan məhrumetmə cəzası gözləyir.