Politoloq: İsrailin toxunulmazlığı dövrü başa çatıb  

Poliqon xəbər verir ki, bunu "RİA Novosti"yə müsahibəsində politoloq Sergey Mixeyev deyib.

"İran siyasi nöqteyi-nəzərdən İsrailin toxunulmazlığı dövrünün başa çatdığını göstərdi. Mənə elə gəlir ki, İsrail və onun müttəfiqləri İranın birbaşa İsrail ərazisinə zərbə endirməsindən bir qədər şokdadırlar, çünki əvvəllər buna heç kim icazə verməyib", deyə ekspert vurğulayıb və qeyd edib ki, İranın təxribatlarının bir hissəsi kimi İsrailin əsas məqsədi Tehranı bölgədə böyük bir qarşıdurmaya cəlb etməkdir. 

Bundan əlavə, Mixeyevin sözlərinə görə, İran faktiki olaraq İsrail və ABŞ-ın strateji zəifliyini nümayiş etdirdi, çünki İsrail özü də Tehranın atdığı raketlərdən 9-unun hədəflərinə çatdığını etiraf edir. 

"Bu o deməkdir ki, nə bizim hava hücumundan müdafiə sistemimiz, nə də müttəfiqlərimizin köməyi 100% təhlükəsizliyi təmin edə bilməz", deyə politoloq qeyd edib.

Bundan əvvəl Amerikanın ABC telekanalı İsrailin böyük ehtimalla yəhudilərin Pasxa bayramından əvvəl İrana cavab zərbələri endirməyəcəyini bildirmişdi.

Telekanalın həmsöhbətinin sözlərinə görə, aprelin 22-də axşamdan başlayaraq aprelin 30-dək davam edəcək bayramdan əvvəl İsrail tərəfinin hər hansı aktiv addım atacağı ehtimalı yoxdur. Rəsmi eyni zamanda vəziyyətin hər an dəyişə biləcəyini vurğulayıb.

Aprelin 13-də axşam İran aprelin 1-də İranın Suriyadakı konsulluğunun binasının dağıdılmasına cavab olaraq İsrailə doğru yüzlərlə pilotsuz təyyarə və raketlər atıb. Hücum təxminən beş saat davam edib. İsrail ona atılan raketlərin və pilotsuz təyyarələrin 99%-ni vurduğunu bildirib.

Poliqon.info