"Seçki Məcəlləsinə görə, namizədin təbliğatı harada aparılırsa, mütləq ora ilə müqavilə olmalıdır"
Bu sözləri Axar.az-a hüquqşünas Müzəffər Baxışov namizədlərin təbliğat-təşviqat ərəfəsində KİV-lərdə heç bir müqaviləsi olmadan açıqlama və şərhlərinin getməsinə münasibət bildirərkən deyib.
Onun sözlərinə görə, bütün KİV-lər namizədlərlə təbliğat ərəfəsində müqavilə ilə çalışmalıdır. Əks təqdirdə bu, qanun pozuntusudur:
“Hər bir halda namizədlə müqavilə olmalıdır və onun nə qədər xərc çəkdiyi göstərilməlidir. Təbliğat-təşviqat qaydalarının pozulmasına görə İnzibati Xətalar Məcəlləsində inzibati məsuliyyət nəzərdə tutulub. Namizəd verdiyi açıqlamada sırf özünü təbliğ edirsə, bu artıq təbliğat hesab olunur. Onun doğulduğu yer, təhsili, işi, fəaliyyəti haqqında məlumat yazırsınızsa, mütləq müqaviləniz olmalıdır. Əks təqdirdə bu, qanun pozuntusudur”.
Hüquqşünas əlavə edib ki, şəxs əvvəlki fəaliyyəti işə məşğul olub açıqlamalar yayırsa, burada heç bir qanun pozuntusu yoxdur:
“Namizədliyini verən şəxs həm də hüquqşünasdırsa və hansısa sayt ona fərqli bir məsələ ilə bağlı müraciət edib açıqlama alırsa, bu təbliğat sayılmır. Həmin şəxs öz fəaliyyəti ilə məşğul olur. Bunun üçün müqavilə lazım deyil. Şəxs işi ilə bağlı açıqlamalar verib, şərhlər yaza, saytlar da bunu işıqlandıra bilər. Burada qanun pozuntusu yoxdur”.
pia.az