“Əgər yaradılacaq televiziya kanalında verilişlər farslaşdırılmış Azərbaycan türkcəsində olacaqsa, bunun xeyrindən çox ziyanı olacaq”
Bu fikirləri Aktual.az-a millət vəkili Sabir Rüstəmxanlı İranda fəaliyyət göstərəcək azərbaycandilli kanalla bağlı fikirlərini bölüşərkən deyib. O qeyd edib ki, bununla yanaşı soydaşlarımızın digər haqları da tanınmalıdır:
“Əgər Azərbaycan türklərinə xidmət istəyirlərsə, orada yayımlanacaq verilişlərin dili və ruhu təmiz olmalıdır. İranda Azərbaycan türklərinin insan, mədəniyyət, təhsil haqlarını təmin etmək üçün çox işlər görmək lazımdır. Bir dənə də olsun, Azərbaycan dilində məktəb yoxdur. Açılacaq televiziyada kimlər çalışacaq, verilişləri kimlər aparacaq? Farsca oxuyub təhsil alan insanlar o verilişləri necə apara bilərlər?
Azərbaycanlıların təhsili, mədəni yüksəlişi, əslində, İranın gələcəyini təmin edən məsələlərdən biridir. İranda daxili qarşıdurma olmasını istəmirlərsə, əhalinin yarıdan çoxunu təşkil edən Azərbaycan türklərinin təhsil və digər haqları tanınmalıdır”.
Məlumat üçün bildirək ki, İranda Azərbaycan dilində televiziya kanalının açılacağı ilə bağlı Azərbaycanda səfərdə olarkən keçirdiyi mətbuat konfransında İran Radio-Televiziya Təşkilatının sədri İzzətullah Zərqami məlumat verib.
Digərxəbərlər
Populyar xəbərlər
