Keçmiş YAP-çı deputat, Müdafiə Nazirliyi mətbuat xidmətinin sabiq rəhbəri Eıdar Sabiroğluna müraciət edərək, parlament seçkilərində iştirak edib, etməyəcəyi ilə maraqlanılıb
E.Sabiroğlu ilə qısa söhbəti təqdim edirik.
- Eldar müəllim, parlament seçkilərində YAP-ın rəsmi siyahısının açıqlanmasına bir neçə gün vaxt qalır. Sizin adınızın həmin siyahıda olması ehtimalı varmı? Ümumiyyətlə, seçkilərə müstəqil şəkildə qatılmaq barədə düşünürsünüzmü?
– Siyahı partiyanın rəhbərliyi tərəfindən hazırlanır. Adətən əvvəlcədən bu barədə rəsmi məlumat verilmir. Lakin kiminsə namizədliyinin irəli sürülməsi barədə qərar qəbul edilibsə, partiyanın qərarı əvvəlcədən həmin şəxsə çatdırılır. Və siyahı elan olunana qədər ona “ağzını bərk saxlaması” tapşırılır. Sürpriz yoxdur. Ona görə də, adımın həmin siyahıya salınmadığı qənaətindəyəm. Qaldı ki sualınızın ikinci hissəsinə, deyə bilərəm ki, belə bir fikrim yoxdu. Çünki partiyanın dəstək vermədiyi şəxsin deputat seçilməsi, demək olar ki mümkün deyil. Ona görə də özümü çətin vəziyyətə salmaq istəmirəm.
- Belə bir məlumat var ki, bu seçkidə YAP-ın siyahısında gənclərə daha çox üstünlük veriləcək…
– Mən bu fikri anlaya bilmirəm. Yəni bununla cəmiyyətə nəyin prioritet olduğunu çatdırmasq istəyirlər? Gənc layiqdisə qoy olsun. Amma dünyanın heç bir yerində belə bir çağırış yoxdur. Beynəlxalq parlamentarizm təcrübəsində seçici ağıllı və zəkalı, natiqlik qabiliyyəti olan, qanunlar üzərində işləmək təcrübəsi olan və sair bu kimi müsbət keyfiyyətlərə malik şəxsləri seçib parlamentə göndərir. Seçkilərdə ümumiyyətlə gənc və ya yaşlı deyə hansısa senzi əsas tutmaq demokratik sistemin tələblərinə uyğun deyil. Mən belə düşünürəm.(azpolitika.info)
pia.az