Bakıda Araz Supermarketlər Şəbəkəsinin “Azadlıq” prospektindəki filialında müştərinin çantası mühafizəçilərin gözü önündən oğurlanıb
Bu barədə AZXEBER.COM-a müraciət edən Bakı şəhər sakini Orxan İsgəndərov adlı vətəndaş söyləyib. O müraciətində marketin saxlama rəfinə qoyduğu çantasının mühafizəçilərin gözü önündən oğurlandığını deyib:
“Bu marketə ilk dəfə daxil olanda mənə xəbərdarlıq etdilər ki, çantamı xüsusi əşyalar üçün nəzərdə tutulmuş rəfə qoyum. Mən də belə etdim. Amma rəfin heç birinin açarı yox idi. Mənim tərəddüt etdiyimi görəndə isə market işçiləri mənə bütün əşyaların nəzarətdə saxlanıldığını və qorxulu heç bir şeyin olmadığını dedilər. Ötən gün də hər zamankı kimi marketə girdim. Təxminən saat 8-ə işləmiş mən öz çantamı rəfə qoydum. On dəqiqə sonra isə marketdən çıxanda çantamın yerində olmadığını gördüm”.
Şikayətçi deyir ki, o marketin mühafizəçilərinə çantasının oğurlanması ilə bağlı məlumat versə də, onlar məsuliyyəti öz üzərlərindən atıblar:
“Mən mühafizəçiyə yaxınlaşaraq, çantamın oğurlandığını söylədim. Mənə “qorxmayın biz bütün əşyaları nəzarətdə saxlayırıq” deyənlər, indi isə mənə “bizlik bir şey yoxdur” deyib çiyinlərini kənara çəkdilər. Polisə müraciət etdim və marketin müşahidə kameralarına baxış keçirildi. Aydın oldu ki, sən demə mənim çantamı bir qadın götürüb. O rəfin qapısının açıq olduğunu görüb, nəzarətsiz qalan çantanı götürüb”.
Şikayətçinin sözlərinə görə onun çantasında sənədləri və “noutbook”u olub.
Hazırda faktla bağlı Binəqədi RPŞ-də cinayət işi qaldırılıb.