Müdafiə nazirinin müavini, general-leytnant Çingiz Məmmədov Ə.Şıxlinskinin heç zaman unudulmayacağını deyib
Bu gün general Əliağa Şıxlinskinin ad günü ilə əlaqədar məzarı ziyarət edilib. Müdafiə Nazirliyinin rəsmiləri və ziyalılar generalın Yasamal qərbistanlığındakı məzarında olublar. Müdafiənazirinin müavini, general-leytnant Çingiz Məmmədov Ə.Şıxlinskinin heç zaman unudulmayacağını deyib.
Tarixçi Şəmistan Nəzirli onu hərb elminin yaradıcılarından adlandırıb. "İlk ordu layihəsini də o hazırlayıb".
Anım mərasimində 416-cı alayın topçusu olan 96 yaşlı Muradəli Heydərov da iştirak edib.
Qeyd edək ki, Əliağa Şıxlinski 1863-ci il Yelizavetpol (Gəncə) quberniyasının Qazax qəzasının Qazaxlı kəndində anadan olub.
1883-cü ildə orduda hərbi xidmətə başlayan Şıxlinski hərb sənətinin sirlərinə yiyələnməyə çalışıb. Bütün bu uğurlu addımlar onu Peterburq artilleriya məktəbinə gətirdi. 1886-cı ildə həmin məktəbi əla qiymətlərlə bitirən Ə. Şıxlinski 1904-1905-ci illər rus-yapon müharibəsində batareya komandiri kimi ön cəbhədə qəhrəmanlıqla vuruşmağa başlayıb. Port-Artur qalasının müdafiəsi zamanı xüsusi şücaət göstərdiyinə görə “Qızıl qılınc”la mükafatlandırılıb.
Müharibədən sonra topçu zabitlər hazırlayan məktəbdə yüksək ixtisaslı hərbçi kimi dərs deməyə başlayan Şıxlinski 1908-ci ildə polkovnik rütbəsi alıb. Hərb elminin daha da dərindən mənimsənilməsi üçün yazdığı, dərs vəsaiti kimi istifadə edilən “Səhra toplarının cəbhədə işlədilməsi” əsəri 1910-cu ildə çap olunub. Bundan əlavə, onun “Şıxlinski üçbucağı”, “Şıxlinski formulu” adlı hərbi yenilikləri topçu zabitlər üçün hazırlanmış dərsliklərə daxil edildi. Bütün bu xidmətlərinə görə gənc hərbçiyə 1912-ci ildə general-mayor rütbəsi verilib.
1914-cü ildə baş verən I dünya müharibəsi zamanı Petroqrad şəhərinin artilleriya müdafiəsi general Əliağa Şıxlinskiyə tapşırılıb. Sonralar Qərb cəbhəsi artilleriya qoşunlarının rəisi, 1917-ci ilin sentyabrından isə 10-cu ordunun komandanı təyin olunub.(an press)