Rusiya xüsusi təyinatlıları Azərbaycan sərhədində - Video

Antiterror əməliyyatları Rusiya Federal Qüvvələri tərəfindən aparılır

Rusiya Azərbaycanla sərhəddə antiterror əməliyyatları keçirir.

Ans Tv-nin şimal bürosunun verdiyi məlumata görə, Dağıstan Respublikasının Məhərrəmkənd rayonunun Yaraq-Qazmalar kəndində yaraqlıların axtarışı və zərərsizləşdirilməsi istiqamətində əməliyyat həyata keçirilir.

Əməliyyatların keçirilməsində əsas məqsəd bu ölkədə fəaliyyət göstərən qeyri-qanuni radikal qrupları və qanunsuz silahlı birləşmələri tamamilə məhv etməkdir.

Azərbaycandan gedən bütün nəqliyyat vasitələri Yaraq-Qazmalar ərazisində qurulan hərbi postlarda ciddi bir şəkildə yoxlanılır.

Dağıstan ərazisində həyata keçirilən antiterror əməliyyatları Rusiya Federal Qüvvələri tərəfindən aparılır.

Samur keçid-məntəqəsindən verilən məlumata görə, Dağıstan Respublikasında keçirilən antiterror əməliyyatları nəzarət-buraxılış məntəqəsinin iş prosesinə mənfi təsir etməyib.

Belə ki, Azərbaycandan Rusiyaya, ya da əksinə hərəkət edən sərnişin və yük nəqliyyat vasitələrinin hərəkəti zamanı hər hansı bir problem yaşanmayıb.

Hazırda Rusiya Azərbaycan sərhədində antiterror əməliyyatları davam etdirilir.