Bu gün Gəncə Ağır Cinayətlər Məhkəməsində dələduzluqda ittiham olunan sabiq hakim Həsən Əliyevin, Elman Məmmədov və Taleh Süleymanovun cinayət işi üzrə növbəti məhkəmə prosesi keçirilib
Hakim Mübariz Məmmədovun sədrliyi ilə keçirilən prosesdə bu gün sabiq hakimə və digərlərinə hökm oxunmalı idi. Amma hakim heyəti təqsirləndirilən şəxslərin barəsində hökmü naməlum səbəblərdən yenə də elan etməyib. Məhkəmə prosesi martın 31-dək təxirə salınıb.
Qeyd edək ki, dövlət ittihamçısı Anar Mirikişiyev sabiq hakim Həsən Əliyevə 10, Elman Məmmədovla Taleh Süleymanovun hər birinə isə 9 il iş istəmişdi.
Xatırladaq ki, 2007-2014-cü illərdə Bakı Ağır Cinayətlər Məhkəməsində hakim işləyən Həsən Əliyevin səlahiyyətlərinə ölkə başçısı İlham Əliyevin sərəncamı ilə ötən ilin fevral ayında xitam verilib.
Təxminən 5 ay sonra isə uzun illər prokurorluq və məhkəmə orqanlarında çalışan H.Əliyevə qarşı Cinayət Məcəlləsinin 178.3.2 (külli miqdarda ziyan vurmaqla dələduzluq törətmə) və 312.2-ci (rüşvət vermə) maddələri ilə ittiham irəli sürülüb və barəsində başqa yerə getməmək haqqında iltizam qətimkan tədbiri seçilib.
Buna səbəb Ramazan Səlimov adlı şəxsin iddiası olub. R.Səlimov iddia edib ki, sabiq hakim ondan vəzifəyə düzəltmək vədi ilə 600 min manat pul alaraq qaytarmayıb.
Sabiq hakim isə nə istintaq zamanı, nə də məhkəmə prosesində ona elan olunmuş ittihamlarla razılaşmayıb, bütün bu olayların ona qarşı qurulmuş bir oyun olduğunu deyib.(Virtualaz.org)
pia.az