DİN-dən Pərvin Abıyevaya cavab: "Bərpa edilməyib..."

DİN-in Mətbuat xidmətindən Pravda.az-ın sorğusuna cavab olaraq xatırladılıb ki, Murad Abdullayev Daxili İşlər naziri, general-polkovnik Vilayət Eyvazovun əmri ilə xidmətdən xaric edilib.

Bildirilib ki, M.Abdullayevin xidmətə bərpası ilə bağlı deyilənlər əsassızdır.

Qeyd: P.Abıyeva ötən gün sosial şəbəkədə canlı yayımda sualları cavablanıdırıb. Aktrisa izləyicilərindən birinin ““Paqonlu” oğlan yazıq oldu” sözlərinə belə reaksiya verib: “Birincisi yazıq deyil, ikincisi öz səhvidir, üçüncüsü də artıq işinə qayıdıb. Ona görə narahat olmayın.”

Xatırlatma: Daxili İşlər Nazirliyinin 2019-cu ilin noyabrın 28-də yaydığı məlumatda qeyd olunub ki, bəzi xəbər saytlarında və sosial şəbəkələrdə təmtəraqla keçirilən ad günündən videogörüntülər paylaşılıb. “Bu da aktrisa Pərvin Abıyevanın paqonlu sevgilisi” başlığı ilə yayılan həmin görüntülərdə üzərində polis geyim forması və atributları əks olunmuş tort, habelə məclisdə polis əməkdaşına yaraşmayan çılğın hərəkətlər diqqət çəkir. DİN rəhbərliyinin göstərişi ilə dərhal müvafiq araşdırmalar aparılıb və ad günü qeyd edilən şəxsin Sumqayıt Şəhər Polis İdarəsinin əməkdaşı, polis leytenantı Murad Abdullayev olduğu müəyyən edilib. O da məlum olub ki, həmin şəxsin xidməti fəaliyyəti də qeyri-qənaətbəxşdir.

Vurğulanıb ki, “Polis haqqında” Qanunun və “DİN əməkdaşlarının etik davranış kodeksi”nin müvafiq maddələrinin tələblərini pozaraq dəbdəbəli eyş-işrət məclisi təşkil etməklə müəmmalı həyat tərzi keçirən şəxslərlə birlikdə doğum gününü qeyd edərkən daxili işlər orqanları əməkdaşı olmasını xüsusi qabartdığına, etdiyi polis adına yaraşmayan çılğın hərəkətlərinin yanındakılar tərəfindən qeydə alınaraq internet resurslarında yayılması ilə nəticələndiyinə, bununla da polisin nüfuzuna xələl gətirdiyinə görə Murad Abdullayev Daxili İşlər nazirinin əmri ilə xidmətdən xaric edilib.

pia.az