Milli Məclisdə özəlləşdirmə və sənədsiz evlər məsələsi qaldırıldı
Milli Məclisdə “Dövlət əmlakının özəlləşdirilməsi haqqında haqqında” qanuna dəyişikliklərin müzakirəsi zamanı çıxış edən deputat Zahid Oruc vətəndaşları narahat edən ciddi bir problemdən bəhs etdi. O, əmlak özəlləşməsi ilə bağlı problerin indiyədək qaldığını bildirdi: “Bu problemi, nəhayət, həll etmək lazımdır.” Bu gün Torpaq Komitəsinin verdiyi sənədləri Reyestr İdarəsi tanımır və ya əksinə. Ona görə vətəndaşlar iki qurumun bir-birinin sənədlərini tanımamasından ciddi şəkildə əziyyət çəkir”. Deputat bu məsələlərlə bağlı parlament dinlənilməsinin keçirilməsini təklif etdi: “Bu gün kəndli öz evinin əmlak sənədlərini almaq üçün çox ciddi problemlərlə üz-üzədir. Mülkiyyət sənədlərinin alınmasını asanlaşdırmaq lazımdır. Bu gün yarım milyondan artıq insan öz evinin real sahibi deyil və özünü kənar ölkənin vətəndaşı kimi hiss edir”. Z.Oruc dövlət teatrı, dövlək sirki və s. qurumların adının üzərində dövlət sözünün işlənməsini düzgün saymadı, adların dəyişdirilməsini zəruri saydı.
Qüdrət Həsənquliyev çıxışında dedi ki, “Bakıelektrikşəbəkə”, “Azəriqaz”, “Azərsu” da təcili özəlləşdirilməlidir: “Bəzi xarici ölkələrdə hətta həbsxanalara özəl şirkətlər nəzarət edir. Bir sıra hallarda bu qurumlara qarşı yönələn tənqidlər dövlətə qarşı yönəlir. Özü də burda özəlləşməyə yalnız Azərbaycan vətəndaşları girişə bilər. Lazım olsa, qanunlara da dəyişiklik etmək mümkündür. Dünyanın heç bir ölkəsində bu qədər elektrik enerjisi itkilərinə yol verilmir. Elektrik enerjisini hansısa özəl şirkət satsa, burda heç bir itki olmayacaq, şəffaflıq da təmin olunacaq”.
Çingiz Qənizadə insanlara reyestrdən çıxarışların artıq səyyar formada verilməsi işinə başlanılmasının yerlərdə təqdir olunduğunu bildirdi: “Bizdə belə bir fikir formalaşıb ki, dövlət bunu gətirib qapımda verməlidir. Bəzən biz öz üzərimizə düşən vəzifələri həll etməkdənsə, dövlətin həll edəcəyini gözləyirik. Müəyyən sənədlərin tələb olunması əslində yaxşıdır. Çünki sonradan məhkəmə çəkişmələrində problemlər yaranır”.
pia.az