“İctimai nəqliyyatda gediş haqqı bahalaşacaq" - Ekspert

““Azəristiliktəchizat”ın noyabrın 15-dən verdiyi istiliyin qiyməti artacaq. Bu il həmçinin ictimai nəqliyyatda da gediş haqqı bahalaşacaq”.

PİA.az xəbər verir ki, bu sözləri əməkhaqqıları, əmək pensiyaları, sosial müavinətlər, təqaüdlər və digər sosial ödənişlərin məbləğlərinin artırılacağı ilə bağlı qərarı dəyərləndirən iqtisadçı Qubad İbadoğlu deyib.

İqtisadçı hesab edir ki, böyük ehtimalla sözügedən artım gələn ilin yanvarından deyil, ən yaxşı halda ikinci rübündən həyata keçiriləcək:

“Dövlət Statistika Komitəsinin yaydığı məlumata görə, ötən ilin yanvar-sentyabr aylarına nisbətən inflyasiya 5,2 faiz olub. Eləcə də ərzaq məhsulları, içkilər və tütün məmulatları 6 faiz, qeyri-ərzaq məhsulları 4,4 faiz, əhaliyə göstərilmiş ödənişli xidmətlər 4,6 faiz bahalaşıb. Görünür ki, inflyasiya səviyyəsinin məqsədli şəkildə aşağı göstərilməsi növbəti ildən pensiya istisna olmaqla əməkhaqqıları, sosial müavinətlər və təqaüdlərin 5-10 faiz artırılmasına hazırlıq xarakteri daşıyır.

Pensiyalara gəlincə, gələn ilin fevral ayında pensiyaların indeksləşdirilməsi orta illik artım tempinə uyğun aparılacaq. DSK-nın məlumatına görə, 2021-ci ilin yanvar-iyul ayları 2020-ci ilin yanvar-iyul aylarına nisbətən orta aylıq nominal əməkhaqqı 1,8 faiz artıb. Bu rəqəm ilin sonunadək iki dəfə yüksələcəyi halda pensiyalar 2, 3 və ya 4 faiz indeksləşdirilməklə gələn ilin yanvar ayından arta bilər. Belə olanda da pensiyaların artımı cüzi məbləğlərlə ifadə olunacaq”.(Pravda.az )

pia.az